मुंबई : प्रधानमंत्री पीक विमा योजनेअंतर्गत नुकसानभरपाई निश्चित करताना प्रत्यक्ष पीक कापणी प्रयोगातून मिळालेले उत्पादन आणि तंत्रज्ञानाच्या आधारे निश्चित केलेले उत्पादन यामध्ये तफावत आढळल्याच्या पार्श्वभूमीवर मुख्यमंत्री देवेंद्र फडणवीस यांनी केंद्र सरकारकडे हा मुद्दा मांडला आहे. त्यांनी केंद्रीय कृषिमंत्री शिवराज सिंह चौहान यांना पत्र पाठवून तांत्रिक उत्पादनाच्या पद्धतीची फेरपडताळणी करण्याची मागणी केली आहे.
वर्धा, यवतमाळ आणि चंद्रपूर जिल्ह्यांतील काही महसूल मंडळांमध्ये प्रत्यक्ष पीक कापणी प्रयोगातून नोंदवलेले उत्पादन आणि तांत्रिक पद्धतीने निश्चित केलेले उत्पादन यामध्ये मोठा फरक आढळल्याचे समोर आले आहे. या फरकामुळे नुकसान झालेल्या काही शेतकऱ्यांच्या पीक विमा दाव्यांवर परिणाम होण्याची शक्यता आहे.
फडणवीस यांनी तंत्रज्ञानाच्या आधारे पीक उत्पादनाचा अंदाज घेण्याच्या YES-TECH पद्धतीचा सर्वंकष आढावा घेण्याची मागणी केली आहे. तांत्रिक अंदाज आणि प्रत्यक्ष पीक कापणी प्रयोगातील आकडेवारी अधिक अचूक आणि विश्वासार्ह करण्याची गरज असल्याचे त्यांनी पत्रात नमूद केले आहे.
दरम्यान, तांत्रिक उत्पादनाच्या आकडेवारीतील तफावत तपासण्यासाठी तज्ज्ञांकडून अभ्यास करण्यात आल्याचेही वृत्त आहे. या प्रक्रियेत आवश्यक सुधारणा झाल्यास नुकसानग्रस्त शेतकऱ्यांना पीक विम्याची भरपाई मिळण्यास मदत होऊ शकते.
या प्रकरणात केंद्र सरकारकडून पुढील निर्णय आणि फेरपडताळणीच्या प्रक्रियेकडे शेतकऱ्यांचे लक्ष लागले आहे.
