पुण्यात गणेशोत्सवाच्या पार्श्वभूमीवर वाहतूक कोंडी टाळण्यासाठी १८ ते २५ सप्टेंबरदरम्यान सहा प्रमुख मार्गांवर ‘No Parking’ लागू करण्यात आले आहे. पुणे शहर वाहतूक शाखेने हा निर्णय घेतला असून, गणेशोत्सवातील देखावे आणि रोषणाई पाहण्यासाठी मध्यवर्ती भागात होणारी गर्दी लक्षात घेऊन वाहतूक व्यवस्थेत बदल करण्यात आले आहेत.
या कालावधीत शिवाजी रस्ता, बाजीराव रस्ता, टिळक रस्ता आणि शास्त्री रस्ता यांसह सहा मार्गांच्या दोन्ही बाजूंना वाहन पार्क करण्यास मनाई करण्यात आली आहे. संबंधित मार्गांवर गर्दी वाढल्यास सायंकाळी ५ वाजल्यानंतर परिस्थितीनुसार वाहतूक बंद करून पर्यायी मार्गाने वळवली जाऊ शकते.
या मार्गांवर No Parking
- शिवाजी रस्ता: जिजामाता चौक ते मंडई चौक आणि मंडई ते शनिपार चौक
- बाजीराव रस्ता: शनिपार चौक ते फुटका बुरुज आणि आप्पा बळवंत चौक ते मोती चौक
- टिळक रस्ता: एस. पी. कॉलेज मुख्य प्रवेशद्वार ते टिळक चौक
- शास्त्री रस्ता: सेनादत्त पोलीस चौकी ते टिळक चौक
या मार्गांवर दोन्ही बाजूंना ‘No Parking’ लागू राहणार आहे. गर्दीच्या परिस्थितीनुसार काही रस्त्यांवरील वाहतूक तात्पुरती बंद केली जाऊ शकते.
वाहतूक पोलिसांनी नागरिकांना प्रतिबंधित मार्गांवर वाहने पार्क न करण्याचे आणि शक्य असल्यास पर्यायी मार्गांचा वापर करण्याचे आवाहन केले आहे. गणेशोत्सवातील गर्दी लक्षात घेता वाहनचालकांनी प्रवासासाठी अतिरिक्त वेळ राखून ठेवावा, तसेच वाहतूक पोलिसांच्या सूचनांचे पालन करावे.
गणेशोत्सव काळात पुण्याच्या मध्यवर्ती भागात मोठ्या प्रमाणात नागरिकांची गर्दी होत असल्याने वाहतूक सुरळीत ठेवण्यासाठी हे निर्बंध महत्त्वाचे ठरणार आहेत. प्रशासनाने नागरिकांना सहकार्य करण्याचे आवाहन केले आहे.
