पंतप्रधान नरेंद्र मोदी यांच्या हस्ते सिंधुदुर्ग जिल्ह्यातील राजकोट किल्ल्यावर उभारलेला छत्रपती शिवाजी महाराजांचा ३३ फूट उंच पुतळा २६ ऑगस्ट रोजी कोसळला. या घटनेनंतर महाराष्ट्रातील राजकारण तापले, आणि पंतप्रधानांनी नाशिक येथे या घटनेबद्दल माफी मागितली. राज्य सरकारने या घटनेची चौकशी करण्यासाठी तज्ज्ञांची समिती नेमली होती, ज्याने १६ पानांचा अहवाल सादर केला आहे.
या समितीचे नेतृत्व पवन धिंग्रा करत होते, ज्यांचा भारतीय नौदलात वीस वर्षांचा अनुभव आहे. समितीत सार्वजनिक बांधकाम विभागाचे सचिव (इमारत) संजय दशपुते, सार्वजनिक बांधकाम विभागाचे माजी मुख्य अभियंता विकास रामगुडे, आयआयटी मुंबईचे प्रा. आर.एस. जांगिड आणि धातू विज्ञान विभागाचे प्रा. परिदा यांचा समावेश होता. अहवाल सादर झाल्यानंतर राज्य सरकार दोषींवर कारवाई करणार असल्याची माहिती उद्योग मंत्री उदय सामंत यांनी दिली.
पुतळा कोसळण्याची कारणे
चौकशी समितीने प्राथमिक निष्कर्षात सांगितले की, पुतळ्याची बांधणी मजबूत नसल्याने, तसेच चुकीच्या पद्धतीने वेल्डिंग केले आणि गंज लागल्यामुळे पुतळा कोसळला. पुतळा उभारल्यानंतर योग्य देखभाल न झाल्यामुळेही तो कोसळला, असे अहवालात नमूद करण्यात आले आहे.
पंतप्रधान मोदींनी ४ डिसेंबर २०२२ रोजी या पुतळ्याचे अनावरण केले होते. पण २६ ऑगस्ट रोजी पुतळा कोसळण्याची दुर्दैवी घटना घडली. या घटनेनंतर शिल्पकार जयदीप आपटे आणि कंत्राटदार चेतन पाटील यांना अटक करण्यात आली आहे. जयदीप आपटेने २८ फुटांच्या पुतळ्याचे काम केले, तर चेतन पाटीलने चौथरा व आजूबाजूच्या भागाचे सुशोभिकरण केले.
या घटनेनंतर राज्य सरकारने दोन समित्या स्थापन केल्या, एक तांत्रिक समिती आणि दुसरी भव्य व उच्च दर्जाचा पुतळा उभारण्यासाठी. या दुसऱ्या समितीत देशातील उत्तम शिल्पकार, स्थापत्य अभियंते, तज्ज्ञ आणि नौदलाचे अधिकारी मनीषा म्हैसकर यांच्या नेतृत्वाखाली कार्यरत असणार आहेत.
