मुंबई : महाराष्ट्रातील बँक ग्राहकांसाठी महत्त्वाची बातमी आहे. 11 सप्टेंबरपासून बँकांच्या शाखांचे कामकाज सलग चार दिवस बंद राहण्याची शक्यता आहे. बँक कर्मचाऱ्यांच्या संपासोबत दुसरा शनिवार, रविवार आणि गणेश चतुर्थीची सुट्टी यामुळे या कालावधीत शाखांमध्ये नियमित व्यवहार करता येणार नाहीत.
बँक कर्मचाऱ्यांनी विविध मागण्यांसाठी संप पुकारल्यामुळे 11 सप्टेंबरपासून बँकांच्या कामकाजावर परिणाम होणार आहे. त्यानंतर दुसरा शनिवार आणि रविवारची नियमित सुट्टी येत असल्याने बँक शाखा बंद राहतील. यानंतर गणेश चतुर्थीच्या सुट्टीमुळे बँकांच्या शाखांच्या कामकाजाला आणखी एक दिवस ब्रेक मिळणार आहे.
त्यामुळे ज्या ग्राहकांना रोख रक्कम जमा करणे, चेक जमा करणे, कागदपत्रांशी संबंधित कामे किंवा बँकेच्या शाखेत प्रत्यक्ष जाऊन करावयाचे व्यवहार आहेत, त्यांनी सुट्टीपूर्वीच आपली कामे पूर्ण करून घेणे महत्त्वाचे ठरणार आहे.
मात्र बँका बंद असल्या तरी UPI, ATM, इंटरनेट बँकिंग आणि मोबाइल बँकिंगसारख्या डिजिटल सेवा सुरू राहण्याची शक्यता आहे. त्यामुळे ऑनलाइन पैसे पाठवणे, बिल भरणे आणि इतर डिजिटल व्यवहार ग्राहकांना करता येऊ शकतात.
दरम्यान, शाखा बंद राहणार असल्याने ग्राहकांनी आवश्यक रोख रक्कम आणि इतर बँकिंग कामांचे नियोजन आधीच करून ठेवावे. बँकांच्या सुट्ट्या आणि संपाच्या पार्श्वभूमीवर ग्राहकांनी आपल्या संबंधित बँकेकडून व्यवहारांच्या उपलब्धतेची माहिती तपासून घेणेही योग्य ठरेल.
