नागपूर शहरातील कलमना पोलीस ठाण्याच्या हद्दीतील पार्वती नगर परिसरात घडलेल्या एका गंभीर घटनेने संपूर्ण शहरात खळबळ उडाली आहे. अगदी किरकोळ वादातून सुरू झालेला हा प्रकार काही वेळातच भीषण हिंसाचारात रूपांतरित झाला. या हिंसाचारात एका २२ वर्षीय युवकाचा मृत्यू झाला असून, आणखी चार जण गंभीर जखमी झाले आहेत. या प्रकरणी पोलिसांनी तत्काळ कारवाई करत एका अल्पवयीनासह पाच आरोपींना ताब्यात घेतले आहे.
या घटनेत मृत्यू झालेल्या युवकाची ओळख ऋतिक पटेल (वय २२) अशी झाली आहे. पोलिसांकडून मिळालेल्या माहितीनुसार, ही घटना शनिवारी रात्री सुमारे ११.३० वाजताच्या सुमारास पार्वती नगर चौक येथे घडली. ऋतिक पटेल हा आपल्या मित्र तन्सु शिवप्रसाद नागपुरे याच्यासोबत चौकात उभा राहून बोलत होता.
याच दरम्यान त्यांचा मित्र मुस्तफा उर्फ गोलू अन्सारी तेथे आला. मुस्तफाने ऋतिक आणि तन्सु यांना दारू पिण्यासाठी सोबत येण्याचा प्रस्ताव दिला. मात्र, दोघांनीही पैसे नसल्याचे कारण देत हा प्रस्ताव नाकारला. तरीदेखील मुस्तफाने त्यांना जबरदस्तीने आपल्या दुचाकीवर बसवले आणि मंगवार कांजी हाऊस चौक येथे नेले, जिथे तिघांनी मिळून दारूचे सेवन केले.
दारू पिऊन परतत असताना खर्चाच्या पैशांवरून ऋतिक पटेल आणि मुस्तफा उर्फ गोलू अन्सारी यांच्यात वाद झाला. सुरुवातीला हा वाद शाब्दिक स्वरूपाचा होता; मात्र काही वेळातच तो अधिक चिघळला. याच दरम्यान मित्राच्या गर्लफ्रेंडबाबत झालेल्या बोलण्यामुळे वातावरण अधिकच तणावपूर्ण झाले आणि वादाला हिंसक वळण लागले.
वाद वाढल्यानंतर मुस्तफा उर्फ गोलू अन्सारी याने आपल्या भावाला आणि वडिलांना घटनास्थळी बोलावले. त्यानंतर आरोपींनी एकत्रितपणे ऋतिक पटेलवर हल्ला चढवला. धारदार शस्त्रे आणि लाठ्या-काठ्यांनी करण्यात आलेल्या या अमानुष मारहाणीत ऋतिक गंभीर जखमी झाला. त्याला तातडीने रुग्णालयात दाखल करण्यात आले; मात्र उपचारादरम्यान त्याचा मृत्यू झाला.
या घटनेत तन्सु शिवप्रसाद नागपुरे याच्यासह आणखी चार जण गंभीर जखमी झाले असून त्यांच्यावर सध्या रुग्णालयात उपचार सुरू आहेत. घटनेची माहिती मिळताच कलमना पोलिसांनी घटनास्थळी धाव घेतली आणि पंचनामा केला. मृतदेह शवविच्छेदनासाठी पाठवण्यात आला आहे.
या प्रकरणी पोलिसांनी एका अल्पवयीनासह पाच आरोपींना ताब्यात घेतले असून, त्यांच्यावर हत्या, गंभीर दुखापत आणि दंगलसदृश कलमांखाली गुन्हे दाखल करण्यात आले आहेत. सध्या प्रकरणाचा पुढील तपास सुरू असून, या घटनेमुळे पार्वती नगर परिसरात भीतीचे वातावरण पसरले आहे. किरकोळ वादातून युवकाचा जीव गेल्याने नागरिकांमध्ये तीव्र संताप व्यक्त केला जात असून आरोपींवर कठोर कारवाई करण्याची मागणी होत आहे.